राग : सारंग
सूर आयो सिर पर छाया आई पायनतर,
पंथी सब झुक रहे देख छाँह गहरी।।
धंधी जन छांड रहेरी धूपन के लिए,
पशु पंछी जीव जंतु चिरिया चुप रहरी ॥
व्रजके सुकुमार लोग दे दे कमार सोवे,
उपवन की व्यार्तामें पोढे पिय प्यारी ॥
सूर अलबेली चल काहेको डरत है ,
महाकी मध्य रात जैसे जेठ की दुपहरी॥
राग : काफ़ी
नेह लग्यो मेरो श्याम सुंदरसो । नेह लग्यो मेरो श्याम सुंदरसो ॥
आयो वसंत सभी बन फुले । खेतन फूली है सरसों ।
मैं पीरी पियाके विरहसो । निकसत ताण अधरसो ॥ कहो जाय बंसीवरसो ॥
फागुन में सब होरी खेलत है, अपने अपने वरसो ।
पिय के वियोग जोगन व्हे निकरी , धूर उड़ावत करसो । चली मथुराकी डगरसो ॥
ऊधो जाय द्वारका कहियो, इतनी अरज मेरी हरीसों ।
विरहव्यथासे जियरा डरत है , जबते गए हरी घरसो । दरस देखनको हों तरसो ॥
सूरदास मेरी इतनी अरज है, कृपासिंधु गिरिधरसों ।
गसेरी नदियाँ, नाव पुरानी, अबके आय उबारो सागारसो । अरज मेरी राधावरसों ॥
राग : मल्हार
हों तो एक नई बात सुन आई।
महरि जसोदा ढोटा जायो,
आंगन बजत बधाई ॥१॥
कहिये कहा कहत नहि आवे,
रतन भूमि छबि छाई ।
नाचत बिरध तरुण अरु बालक,
गोरस कीच मचाई ॥२॥
द्वारें भीतर गोप ग्वालन की,
वरनों कहा बढाई ।
सूरदास प्रभु अंतरयामी,
नंदसुवन सुखदाई ॥३॥
