राग : सारंग
सूर आयो सिर पर छाया आई पायनतर,
पंथी सब झुक रहे देख छाँह गहरी।।
धंधी जन छांड रहेरी धूपन के लिए,
पशु पंछी जीव जंतु चिरिया चुप रहरी ॥
व्रजके सुकुमार लोग दे दे कमार सोवे,
उपवन की व्यार्तामें पोढे पिय प्यारी ॥
सूर अलबेली चल काहेको डरत है ,
महाकी मध्य रात जैसे जेठ की दुपहरी॥
राग : कान्हरो
फूल भवन में गिरिधर बैठे फूलन को शोभीत सिंगार।
फूलन को कटी बन्यो पिछोरा फूलन बांधे पेंच संवार ॥
फूलनकी बेनी जू बनी सीर फूलन के जू बने सब हार ।
फूलन के मुक्त छबी छाजत फूलन लटकन सरस संवार ॥
करन फूल फूलन कर पॉहोची गेंद फूल जल करत विहार ।
राधा माधो हसत परस्पर दास निरखत डारत तन वार ॥
हरी भागे, हलधरजू भागे, नंदमहरहू घेरे
तबही मोहन निकसी द्वारव्हे, सखा नाम ले टेरे ।२।
द्वार पुकार सुनत नही कोऊ, तब हरी चढ़े अटारी
आओ रे आओ सखा संग घेरे , घर घेर्यो व्रजनारी ।३।
सुनत टेरे संगी सब दौरे जब अपने धाम ।
अर्जुन तोक कृष्ण मधुमंगल सुबल सुबाहु श्रीदामा ।४।
ग्वालिनी घेर परी जब रोकी आनन पाए नेरे।
चंद्रावली ललितादी आदि श्याम मनोहर घेरे । ५ ।
कित जेहो वस् परे हमारे भजी न सको नन्दलाल ।
फगुवा में हम लेहे पीताम्बर वनमाल । ६।
केसरी डारी सिसते मुख पर शेरी मांड्त राधे ।
विष्णुदास प्रभु भुज गहि गाढे मनवांछित फल साधे ॥७॥
राग : काफ़ी
नेह लग्यो मेरो श्याम सुंदरसो । नेह लग्यो मेरो श्याम सुंदरसो ॥
आयो वसंत सभी बन फुले । खेतन फूली है सरसों ।
मैं पीरी पियाके विरहसो । निकसत ताण अधरसो ॥ कहो जाय बंसीवरसो ॥
फागुन में सब होरी खेलत है, अपने अपने वरसो ।
पिय के वियोग जोगन व्हे निकरी , धूर उड़ावत करसो । चली मथुराकी डगरसो ॥
ऊधो जाय द्वारका कहियो, इतनी अरज मेरी हरीसों ।
विरहव्यथासे जियरा डरत है , जबते गए हरी घरसो । दरस देखनको हों तरसो ॥
सूरदास मेरी इतनी अरज है, कृपासिंधु गिरिधरसों ।
गसेरी नदियाँ, नाव पुरानी, अबके आय उबारो सागारसो । अरज मेरी राधावरसों ॥
